சுக்கிரனுடன் ராகு ,கேதுக்கள் மிக நெருக்கமான பாகையில் இணைந்தால்?....்(உதாரண விளக்க ஜாதகம்)
பொதுவாக எந்த ஒரு கிரகத்துடன் ராகு ,கேதுக்கள் 5 டிகிரிக்குள் மிக நெருங்கி இருக்கக்கூடாது.
அப்படி இருந்தால் சுய ஜாதகத்தில் ராகு கேதுக்கள் பாவர் சம்பந்தம் பெற்று ,சுப தன்மையற்று ,சுய ஜாதகத்தில் இருந்தால் ,தான் இணைந்த கிரகத்தின் பலனையும் ,ஆதிபத்தியத்தையும் ,காரகத்துவத்தையும் முழுமையாக கெடுத்துவிடும்.
கடந்த இரு நாட்களில் இரண்டு ஜாதகங்களில் ஒரு விஷயம் குறிப்பாக தெரிந்தது.
சுக்கிரன் ஒரு ஜாதகத்தில் காதல் ,திருமணம் ,காமம் போன்ற விஷயங்களுக்கு மட்டுமல்லாமல் மனித உடலில் ஆண் ,பெண் இனப்பெருக்க உறுப்புகள்,சர்க்கரை நோய், அடிவயிறு சார்ந்த கழிவுநீக்க (Kidney only) பகுதிகளுக்கும் சுக்கிரனே காரகத்துவம் வாய்ந்தவர்.(சனி கழிவு பகுதி)
சுக்கிரனுடைய காரகத்துவங்கள் நிறைய இருந்தாலும் அவற்றில் மேற்சொன்னது மிகக் குறிப்பிடத்தக்கது.
இங்கு குறிப்பிட்டுள்ள இரண்டு ஜாதகங்களும் சிறுநீரக பிரச்சினையால் பாதிக்கப்பட்ட ஜாதகம்.
கும்ப லக்னமாகி 4,9ஆம் அதிபதியாகிய சுக்கிரன் இரண்டாம் இடத்தில் உச்சம் பெற்று, ராகுவுடன்
4 டிகிரிக்குள் இணைந்துள்ளார்.
கும்ப லக்னத்திற்கு யோகாதிபதி மற்றும் பாதகாதிபதியும் சுக்கிரனே. கும்ப லக்னத்திற்கு 4ம் இடமான சுக ஸ்தானாதிபதி ராகுவுடன் இணைந்து கெட்டுள்ளது.
13 வயதில் சிறுநீரக மாற்று ஆபரேஷன் ஜாதகர் செய்துள்ளார்.
சுகஸ்தானாதிபதி ராகுவின் பிடியில் உள்ளதால் மருந்து ,மாத்திரை தயவில் வாழ்க்கையை ஒட்டக்கூடிய அமைப்பில் உள்ளார்.
மற்றொரு ஜாதகத்தில் சுக்கிரன் ,ராகு ,சனி இணைந்துள்ளது. இதில் சுக்கிரனும் சனியும் ஒரே டிகிரியில் உள்ளது. சுக்கிரனுக்கும் ராகுவுக்கும் ஆன இடைவெளி 3 டிகிரி மட்டுமே.
தற்போது அட்டமாதிபதி திசையில் ராகு புத்தி நடக்கிறது. சிறுநீரகத்தில் சதை வளர்ந்து உள்ளதால் கண்டிப்பாக ஆபரேஷன் செய்ய வேண்டும் என டாக்டர்கள் கூறிவிட்டனர்.
ராகு புத்தி ஆரம்பித்து பதினைந்து நாட்கள் மட்டுமே ஆகின்றன.
உச்ச குரு பார்த்தும் பலனில்லை.குரு பார்வை அனைத்து இடத்திலும் செல்லாது.
சுக்கிரனுடன் ராகு இணைந்து இருப்பது கலப்புத் திருமணத்தையோ அல்லது பிற்காலத்தில் சிறுநீரகம்,பாலியல் சார்ந்த பிரச்சனைகளையோ கண்டிப்பாக கொடுக்கும்.
பிரச்சனை உடல்நிலை சார்ந்துகொடுக்க வேண்டுமா அல்லது திருமணம் சார்ந்து கொடுக்க வேண்டுமா என்பதை இறைவன் தான் தீர்மானிப்பான்.ஆனால் பிரச்சனை உறுதியாக உண்டு.
நேற்று பார்த்த மற்றொரு ஜாதகத்தில் சுக்கிரன் கேதுவுடன் கூடி ஒரு டிகிரி வித்தியாசத்தில் மட்டுமே இருந்ததால் ஜாதகருக்கு முழுமையாக தாம்பத்திய சுகத்தை தரக்கூடிய அமைப்பில் இருக்கும் சுக்கிரன் கெட்டு விட்டதால் திருமணமே ஆகவில்லை. கேது தடையை ஏற்படுத்துபவர்.வயது 37.
ராகு கேதுக்கள் எந்த ஒரு கிரகத்துடன் மிகவும் நெருக்கமான நிலையில் இருந்தால் அந்த கிரகத்தின் பலனை கெடுத்துவிடும் என்பதை தெளிவாக உணர முடிகிறது. மேலும் பாவ கிரக சம்பந்தப்பட்ட சம்பந்தம் ராகுக்கு கிடைத்தால் துவைத்து தொங்க போட்டு விடுகிறது.
சில கர்மாக்களை நாம் எவ்வளவு முயற்சி செய்தாலும் மாற்றமுடியாது. அதுவே கர்ம வினைப்பயன்.
திருச்சிற்றம்பலம்!
